ਪੰਜ ਸਾਲ ਪਹਿਲਾਂ ਦੁਨੀਆ ਨੂੰ ਹਿਲਾ ਕੇ ਰੱਖ ਦੇਣ ਵਾਲੇ ਕੋਰੋਨਾਵਾਇਰਸ ਨੇ ਇੱਕ ਵਾਰ ਫਿਰ ਆਪਣਾ ਸਿਰ ਚੁੱਕਣਾ ਸ਼ੁਰੂ ਕਰ ਦਿੱਤਾ ਹੈ। ਘਰ ਤੋਂ ਕੰਮ, ਮਾਸਕ, ਲਾਕਡਾਊਨ ਅਤੇ ਖਾਲੀ ਗਲੀਆਂ ਦੀਆਂ ਯਾਦਾਂ ਅਜੇ ਵੀ ਲੋਕਾਂ ਦੇ ਮਨਾਂ ਵਿੱਚ ਤਾਜ਼ਾ ਹਨ। ਅਜਿਹੀ ਸਥਿਤੀ ਵਿੱਚ, ਜਦੋਂ ਕੋਵਿਡ-19 JN.1 ਦੇ ਨਵੇਂ ਰੂਪ ਦੀ ਖ਼ਬਰ ਸਾਹਮਣੇ ਆਈ, ਤਾਂ ਲੋਕਾਂ ਦੇ ਮੰਨ ਅੰਦਰ ਚਿੰਤਾ ਦੀ ਲਹਿਰ ਫੈਲਣਾ ਸੁਭਾਵਿਕ ਹੈ। ਕੀ ਉਹੀ ਹਾਲਾਤ ਦੁਬਾਰਾ ਵਾਪਸ ਆਉਣ ਵਾਲੇ ਹਨ? ਕੀ ਮਾਸਕ, ਸਮਾਜਿਕ ਦੂਰੀ ਅਤੇ ਸੈਨੀਟਾਈਜ਼ਰ ਸਾਡੀ ਜ਼ਿੰਦਗੀ ਦਾ ਹਿੱਸਾ ਬਣ ਜਾਣਗੇ? ਆਓ ਜਾਣਦੇ ਹਾਂ ਇਸ ਨਵੇਂ ਖ਼ਤਰੇ ਨਾਲ ਜੁੜੀ ਹਰ ਮਹੱਤਵਪੂਰਨ ਜਾਣਕਾਰੀ…
ਜਾਣੋ ਕੀ ਹੈ JN.1 ਵੇਰੀਐਂਟ
JN.1, ਕੋਰੋਨਾਵਾਇਰਸ ਦੇ ਓਮੀਕਰੋਨ ਪਰਿਵਾਰ ਦਾ ਇੱਕ ਸਬ-ਵੇਰੀਐਂਟ ਹੈ, ਜਿਸਦੀ ਪਛਾਣ ਪਹਿਲੀ ਵਾਰ ਅਗਸਤ 2023 ਵਿੱਚ ਕੀਤੀ ਗਈ ਸੀ। ਇਹ ਵੇਰੀਐਂਟ BA.2.86 ਨਾਲ ਸਬੰਧਤ ਹੈ ਅਤੇ ਵਿਗਿਆਨੀਆਂ ਦੇ ਅਨੁਸਾਰ ਇਸ ਵਿੱਚ ਪਰਿਵਰਤਨ ਤੇਜ਼ੀ ਨਾਲ ਹੋ ਰਹੇ ਹਨ, ਜਿਸ ਕਾਰਨ ਇਸਦੀ ਸੰਚਾਰ ਦਰ ਵੀ ਉੱਚੀ ਹੈ। ਯਾਨੀ ਕਿ ਇਹ ਵੇਰੀਐਂਟ ਪਹਿਲਾਂ ਨਾਲੋਂ ਤੇਜ਼ੀ ਨਾਲ ਫੈਲ ਸਕਦਾ ਹੈ।
ਇਸਦੇ ਲੱਛਣ ਕੀ ਹਨ?
ਅਮਰੀਕੀ ਏਜੰਸੀ ਸੀਡੀਸੀ ਦੇ ਅਨੁਸਾਰ, JN.1 ਦੇ ਲੱਛਣ ਹੋਰ ਵੇਰੀਐਂਟ ਤੋਂ ਬਹੁਤ ਵੱਖਰੇ ਨਹੀਂ ਹਨ ਪਰ ਇਹ ਆਪਣੇ ਤੇਜ਼ੀ ਨਾਲ ਫੈਲਣ ਲਈ ਵਧੇਰੇ ਜਾਣਿਆ ਜਾਂਦਾ ਹੈ। ਲੱਛਣਾਂ ਵਿੱਚ ਸ਼ਾਮਲ ਹਨ: ਨੱਕ ਵਗਣਾ, ਸੁੱਕੀ ਖੰਘ, ਬੁਖ਼ਾਰ, ਗਲੇ ਵਿੱਚ ਖਰਾਸ਼, ਸਿਰ ਦਰਦ, ਉਲਟੀਆਂ ਜਾਂ ਮਤਲੀ, ਦਸਤ, ਠੰਢ ਲੱਗਣਾ ਆਦਿ।
ਭਾਰਤ ‘ਚ ਕਿੰਨਾ ਹੈ ਇਸ ਦਾ ਖ਼ਤਰਾ
ਇਸ ਵਾਇਰਸ ਦੀ ਇਸ ਵੇਲੇ ਭਾਰਤ ਵਿੱਚ ਸਥਿਤੀ ਕੰਟਰੋਲ ਵਿਚ ਹੈ ਪਰ ਚੌਕਸੀ ਜ਼ਰੂਰੀ ਹੈ। ਜਨਵਰੀ 2024 ਵਿੱਚ ਦਿੱਲੀ ਵਿੱਚ JN.1 ਦਾ ਇੱਕ ਮਾਮਲਾ ਸਾਹਮਣੇ ਆਇਆ ਸੀ ਪਰ ਪਿਛਲੇ ਦੋ ਦਿਨਾਂ ਵਿੱਚ 257 ਨਵੇਂ ਕੇਸਾਂ ਅਤੇ ਦੋ ਮੌਤਾਂ ਨੇ ਚਿੰਤਾਵਾਂ ਵਧਾ ਦਿੱਤੀਆਂ ਹਨ। ਚੰਗੀ ਗੱਲ ਇਹ ਹੈ ਕਿ ਭਾਰਤ ਦੀ ਇੱਕ ਵੱਡੀ ਆਬਾਦੀ ਦਾ ਟੀਕਾਕਰਨ ਕੀਤਾ ਗਿਆ ਹੈ ਅਤੇ ਪਹਿਲਾਂ ਓਮੀਕ੍ਰੋਨ ਦੇ ਸੰਪਰਕ ਵਿੱਚ ਆਉਣ ਕਾਰਨ ਇਮਿਊਨਿਟੀ ਵਿੱਚ ਸੁਧਾਰ ਹੋਇਆ ਹੈ। ਇਸ ਲਈ, ਇਸਦਾ ਪ੍ਰਭਾਵ ਅਜੇ ਗੰਭੀਰ ਨਹੀਂ ਜਾਪਦਾ।
ਕੀ ਕਹਿੰਦੇ ਹਨ ਮਾਹਿਰ?
ਏਮਜ਼ ਦਿੱਲੀ ਦੇ ਇੱਕ ਮਾਹਰ ਅਨੁਸਾਰ, ਇਹ ਨਵਾਂ ਰੂਪ ਓਮੀਕਰੋਨ ਦੇ LF.7 ਅਤੇ NB.1.8 ਵਰਗੇ ਉਪ-ਰੂਪਾਂ ਨਾਲ ਸਬੰਧਤ ਹੈ। ਹਾਲਾਂਕਿ, ਇਸਦੇ ਲੱਛਣ ਹੁਣ ਤੱਕ ਹਲਕੇ ਰਹੇ ਹਨ। ਉਹ ਕਹਿੰਦੇ ਹਨ ਕਿ ਇਹ ਹਰ ਸਾਲ ਮੌਸਮੀ ਇਨਫਲੂਐਂਜ਼ਾ ਵਾਂਗ ਉੱਭਰਦਾ ਹੈ ਅਤੇ ਫਿਰ ਚਲਾ ਜਾਂਦਾ ਹੈ। ਬਹੁਤ ਸਾਰੇ ਮਰੀਜ਼ ਉਸਦੀ ਓਪੀਡੀ ਵਿੱਚ ਗਲੇ ਵਿੱਚ ਖਰਾਸ਼, ਜ਼ੁਕਾਮ, ਫਲੂ ਅਤੇ ਬੁਖ਼ਾਰ ਦੀਆਂ ਸ਼ਿਕਾਇਤਾਂ ਲੈ ਕੇ ਆ ਰਹੇ ਹਨ ਪਰ ਜ਼ਿਆਦਾਤਰ ਮਾਮਲਿਆਂ ਵਿੱਚ ਇਨਫਲੂਐਂਜ਼ਾ-ਬੀ ਦੀ ਲਾਗ ਪਾਈ ਗਈ ਹੈ, ਕੋਰੋਨਾ ਦੀ ਨਹੀਂ।
ਇਸ ਮੌਕੇ ਕੀ ਕਰਨਾ ਚਾਹੀਦੈ?
. ਭੀੜ ਤੋਂ ਬਚੋ
. ਮਾਸਕ ਪਾ ਕੇ ਰੱਖੋ
. ਨਿਯਮਿਤ ਤੌਰ ‘ਤੇ ਹੱਥ ਧੋਵੋ ਜਾਂ ਸੈਨੀਟਾਈਜ਼ਰ ਦੀ ਵਰਤੋਂ ਕਰੋ
. ਜੇਕਰ ਲੱਛਣ ਦਿਖਾਈ ਦਿੰਦੇ ਹਨ ਤਾਂ ਤੁਰੰਤ ਅਲੱਗ ਹੋ ਜਾਓ
. ਬਜ਼ੁਰਗ ਅਤੇ ਘੱਟ ਪ੍ਰਤੀਰੋਧਕ ਸ਼ਕਤੀ ਵਾਲੇ ਲੋਕ ਰਹਿਣ ਸਾਵਧਾਨ
ਬਜ਼ੁਰਗ ਲੋਕ ਰਹਿਣ ਸਾਵਧਾਨ
ਇਹ ਨਵਾਂ ਵੇਰੀਐਂਟ ਹਰ ਉਮਰ ਦੇ ਲੋਕਾਂ ਨੂੰ ਪ੍ਰਭਾਵਿਤ ਕਰ ਸਕਦਾ ਹੈ ਪਰ ਹਾਂਗ ਕਾਂਗ ਅਤੇ ਥਾਈਲੈਂਡ ਤੋਂ ਆਈਆਂ ਰਿਪੋਰਟਾਂ ਤੋਂ ਪਤਾ ਚੱਲਦਾ ਹੈ ਕਿ ਜ਼ਿਆਦਾਤਰ ਮੌਤਾਂ ਬਜ਼ੁਰਗਾਂ ਵਿੱਚ ਦਰਜ ਕੀਤੀਆਂ ਗਈਆਂ ਹਨ। ਜਿਹੜੇ ਲੋਕ ਬੂਸਟਰ ਖੁਰਾਕ ਨਹੀਂ ਲੈ ਸਕੇ ਹਨ, ਉਨ੍ਹਾਂ ਨੂੰ ਵੀ ਵਧੇਰੇ ਜੋਖਮ ਹੈ।
ਕੀ ਫਿਰ ਲੱਗ ਸਕਦੈ ਲਾਕਡਾਊਨ?
ਮਾਹਿਰਾਂ ਅਨੁਸਾਰ, ਇਸ ਵੇਲੇ ਲਾਕਡਾਊਨ ਵਰਗੀਆਂ ਸਖ਼ਤ ਪਾਬੰਦੀਆਂ ਦੀ ਲੋੜ ਨਹੀਂ ਹੈ ਪਰ ਚੌਕਸੀ ਬਹੁਤ ਜ਼ਰੂਰੀ ਹੈ। ਇਹ ਵਾਇਰਸ ਉਨ੍ਹਾਂ ਲੋਕਾਂ ਲਈ ਗੰਭੀਰ ਖ਼ਤਰਾ ਨਹੀਂ ਪੈਦਾ ਕਰ ਰਿਹਾ ਹੈ, ਜਿਨ੍ਹਾਂ ਨੇ ਟੀਕਾ ਅਤੇ ਬੂਸਟਰ ਖੁਰਾਕ ਲਈ ਹੈ। ਮਾਮਲੇ ਘੱਟ ਹੋਣ ਕਾਰਨ ਅਜੇ ਲਾਕਡਾਊਨ ਵਰਗੇ ਹਾਲਾਤ ਨਹੀਂ ਹਨ।
